Կառավարության հաստատած՝ ուսման վարձը եկամտային հարկից փոխհատուցվող մասնագիտությունների ցանկում ներառված է տնտեսագիտական ընդամենը մեկ մասնագիտություն. Գոռ Մելիք-Սահակյան
Հայաստանի Պետական Տնտեսագիտական Համալսարանի ուսանողական խորհրդի նախագահ Գոռ Մելիք-Սահակյանը իր ֆեյսբուքյան էջում գրում է.
Ընդամենը 1 ծրագի՞ր
Այսօր ՀՀ Կառավարությունը հաստատեց մասնագիտությունների ցանկը, որոնցից որևէ մեկով առկա ուսուցման մագիստրատուրայում, ասպիրանտուրայում և օրդինատուրայում սովորող ուսանողների վարձը կփոխհատուցվի աշխատավարձից վճարվող եկամտային հարկից:
Հայաստանի Պետական Տնտեսագիտական համալսարանը 2020-2021 ուստարվա համար մշակել է մի շարք մագիստրոսական ծրագրեր, որոնց դասապրոցեսն իրականացվելու է երեկոյան ժամերին՝ հատուկ հաշվի առնելով աշխատող ուսանողների շահերը: Սակայն Կառավարության այսօրվա որոշմամբ ՀՊՏՀ-ի միայն «Վիճակագրություն» մասնագիտության մագիստրոսական ծրագիրն է ներառված ցանկի մեջ:
Ուզում ենք նշել, որ աշխատող ուսանողների գերակշիռ մասը աշխատում են բանկային համակարգում, և արդարացի չենք համարում «Բանկային գործի կազմակերպում» մագիստրոսական ծրագրի չներառումը ցանկի մեջ:
Հայաստանի Հանրապետության արժեթղթերի շուկան, ըստ մասնագետների, թերզարգացած է. այն զարգացնելու համար նպատակահարմար է ներառել այդ մասնագիտության մագիստրոսական ծրագիրը նույնպես, որը խթան կհանդիսանա տվյալ ծրագրի շուրջ ուսանողների հետաքրքրության բարձրացմանը:
«Ֆինանսներ» և «Կառավարում» մասնագիտությունները մշտապես գտնվել են մրցունակ տիրույթում, և լավ մասնագետների պահանջարկը միշտ էլ շուկայում մեծ է. չներառել հետևյալ մասնագիտացումների ոչ մի մագիստրոսական ծրագիր նույնպես արդարացի չէ:
Այսպես կարելի է թվարկել բոլոր մասնագիտացումները, քանի որ տնտեսագիտությունը միշտ էլ եղել է արդիական և պահանջված մասնագիտություն և կշարունակի աշխատաշուկայում մնալ գերակա դիրքերում:
Ամփոփելով ուզում ենք դիմել ՀՀ Կառավարությանը՝ խնդրելով վերանայել մասնագիտությունների շարքը, ներառել տնտեսագիտական ոլորտի մի քանի մագիստրոսական ծրագրեր ևս:
Մի՛ զրկեք ուսանողներին ուսումը շարունակելու հնարավորությունից