Ոչ մի գիտական ապացույց չկա, որ բաց տարածքում դիմակ կրելը կանխարգելում է վարակումը. քրոնիկական հիվանդություններ ունեցողներին դա կարող է ավելի վնասել. բժիշկ
Կարևոր է հասկանալ՝ արդյո՞ք բաց տարածքներում դիմակ կրելը որևէ օգուտ, ապացուցված էֆեկտիվություն ունի, թե՞ ոչ: Ես՝ որպես բժիշկ, ոչ մի տեղ, ոչ մի գիտական հոդվածում չեմ կարդացել, որ բաց տարածքներում դիմակ կրելը հավաստի կերպով կանխարգելում է վիրուսով վարակումը կամ դանդաղեցնում է վիրուսի տարածումը:
Այս մասին Alternativ.am-ի հետ զրույցում ասաց բժիշկ-ուռուցքաբան Սերգեյ Մխիթարյանը՝ խոսելով բացօթյա տարածքներում դիմակի պարտադիր կրման հետևանքների մասին:
Բժշկի խոսքով՝ բաց տարածքներում դիմակ կրելը կարող է որոշակի վնաս հասցնել տարեց քաղաքացիներին: «50-ից բարձր տարիքային խմբին պատկանող անձանցից գրեթե յուրաքանչյուրը որևէ քրոնիկական հիվանդություն ունի՝ սիրտ-անոթային, շնչառական հիվանդություն, իհարկե, դիմակ կրելը կարող է որոշակի վնաս հասցնել այն կրող քաղաքացու առողջությանը, քանի որ շնչառությունը խանգարվում է:
Եթե տվյալ անձը և՛ բաց, և՛ փակ տարածքներում օրվա մեծ մասը պետք է դիմակ կրի, բնականաբար, տուժում է շնչառությունը, և նրա ունեցած խնդիրները կարող են է՛լ ավելի խորանալ՝ վատթարացնալով նրա վիճակը: Մի փոքր դժվար է ասել, թե երիտասարդ քաղաքացիներին, որոնք գլխավորապես զերծ են նման խնդիրներից, բաց տարածքներում դիմակ կրելը կվնասի, թե ոչ, բայց եթե այս որոշումն ավելի երկար ժամանակ գործի, օրինակ, ամիսներ, ապա կարող ենք ենթադրել, որ վերջիններիս առողջությունը ևս կվնասվի»,- նշեց Մխիթարյանը:
Ըստ մեր զրուցակցի՝ հետևյալ իրավիճակի ականատեսն ենք՝ մի կողմից բաց տարածքներում դիմակ կրելը ոչնչով արդարացված չէ, մյուս կողմից էլ ռիսկ կա, որ բաց տարածքներում դիմակ կրելը կարող է վնասել քաղաքացու առողջությանը կամ վատթարացնել նրա՝ արդեն իսկ ունեցած քրոնիկական հիվանդությունը:
Բժիշկն ընդգծում է, որ շնչառական հիվանդություններ ունեցող մարդկանց համար հավելյալ բացասական գործոն է շոգ եղանակը: Շոգին դիմակով դժվար է շնչելը, իսկ տվյալ մարդն առանց այդ էլ շնչառական խնդիրներ ուներ: Սա, ըստ մեր զրուցակցի, հավելյալ բարդություններ կարող է առաջացնել:
«Հիմա հանրապետությունում տարածված են կասկածելի ծագման դիմակներ, որոնք չգիտես՝ որտեղ են արտադրվում, ինչ հումքից, ինչ պայմաններում: Եթե չպահպանվեն մի շարք նորմեր, ապա կասկածելի հումքից ու կասկածելի պայմաններում արտադրված դիմակն ինքնին կարող է վտանգ ներկայացնել մարդկանց առողջության համար: Դիմակը պետք է փոխել միջինում երկու-երեք ժամը մեկ, բայց դա չի նշանակում, որ մի դիմակը կես ժամ կրելուց հետո այն հանելը, ինչ-որ տեղ դնելը, ապա կրկին կրելը ճիշտ է: Այդպիսի դիմակն արդեն անիմաստ է կիրառել, քանի որ դա դրվել է մի մակերեսի վրա, որը ինֆեկցիաներ, բակտերիաներ ու սնկեր կարող է պարունակել, որոնք էլ կրկնակի կրելուց կվնասեն մարդկանց առողջությանը: Դիմակի կրկնակի կրումը ոչ մի օգուտ չունի, պետք է ամեն անգամ նորը կրել»,- նկատեց բժիշկը:
Սերգեյ Մխիթարյանը նաև անդրադարձավ ձեռնոցների բազմակի կրման խնդրին: «Շատ քաղաքացիներ ձեռնոցը պահում են պայուսակում, ամեն անգամ խանութ կամ այլ փակ տարածք մուտք գործելիս նույն ձեռնոցը մի քանի անգամ դնում-հանում են, ապա այն կրկին տեղավորում պայուսակի մեջ: Սա կարող է վնասել տվյալ անձի առողջությանը, նաև այն մարդու առողջությանը, որի հետ շփվում է այդ անձը: Այսինքն՝ ձեռնոցները ևս, ինչպես դիմակները, պետք է լինեն մեկանգամյա օգտագործման: Ամեն անգամ պետք է նորն օգտագործել, միայն այդ դեպքում ձեռնոցների կիրառումը կարող է կանխարգելիչ բնույթ ունենալ, հակառակ դեպքում կարող են խնդիրներ առաջանալ: Բուն հումքի պատճառով ձեռնոցի երկարատև կրումը կարող է մաշկային խնդիրներ առաջ բերել, բազմակի կրման դեպքում էլ բակտերիալ ու սնկային հիվանդությունների պատճառ հանդիսանալ: Հիշեցնենք, որ նույն խնդիրը կա նաև դիմակների բազմակի կրման դեպքում. դիմակը պահվում է ինչ-որ տեղում, որտեղ բակտերիաներ, հարուցիչներ կան, և երկրորդ անգամ դիմակն օգտագործելիս դրանք արդեն փոխանցվում են այն կրողին և հավելյալ խնդիրների ծագման պատճառ դառնում: Այսինքն՝ կրկնակի կիրառումը ոչ միայն չի պաշտպանում, այլև հավելյալ վնասում է»,- ընդգծեց բժիշկ Մխիթարյանը:
Գոհար Մակարյան