Կորոնավիրուսի պատճառով գրանցված մահերի գերակշիռ մասի պատասխանատուն իշխող վարչակարգն ու անձամբ վարչապետ Փաշինյանն են
Մինչև ողջ աշխարհը փորձում է հաղթահարել նոր տեսակի կորոնավիրուսի համավարակը, Հայաստանում այն հետզհետե ավելի է տարածվում: Օրական կտրվածքով ունենք 300-ից ավելի վարակվածներ, իսկ մահերը քանակը գերազանցում է 110-ը: Ըստ վարչապետ Փաշինյանի՝ վիրուսի հետ կապված ունենք բավական ծանր իրավիճակ, գործ ունենք վարակի երկրորդ ալիքի հետ:
Հաճախ են միմյանց հետ համեմատում Հայաստանի և Վրաստանի՝ կորոնավիրուսի դեմ պայքարի փորձը՝ նախապատվությունը տալով վրացական կողմին: Երբ աշխարհը պատուհասած վիրուսը մոտենում էր մեր տարածաշրջանին, Վրաստանի իշխանությունները փակեցին իրենց օդային ու ցամաքային սահմանը, կարճ ժամանակ անց խստագույն կանոններով կարանտին սահմանեցին, չբախվեցին դիմակների և այլ՝ վիրուսի տարածմանը ինչ-որ չափով խոչընդոտող պարագաների բացակայության հարցի հետ: Իսկ Հայաստանում անգամ չդադարեցվեցին վիրուսի տարածման օջախներ դարձած Իտալիայից և Իրանից դեպի Հայաստան եկող չվերթները, երկրի բարձր ղեկավարության կողմից վիրուսը որակվեց որպես «ինչ-որ մեկի շուն», «ոչ այնքան վտանգավոր վիրուս», ում դեմ կարող ենք պայքարել «տնական սպիրտով, պինցետով»...
Փաստ է, որ կառավարությունը տապալվել է կորոնավիրուսի տարածման դեմ պայքարում. դա են վկայում ամենօրյա ցուցանիշները: Ի սկզբանե իշխանության ցուցաբերած անլուրջ մոտեցման հետևանքով բնակչությունն էլ սկսեց անլուրջ վերաբերել հիվանդությանը, իսկ երբ գլխի ընկան, որ իրավիճակը վերահսկողությունից դուրս է գալիս, արդեն ուշ էր:
Երեկվա՝ մայիսի 28-ի դրությամբ, կորոնավիրուսային հիվանդության վարակման 442 նոր դեպք է հաստատվել, մահերի քանակը 113-ն է: Ընդհանուր առմամբ ունենք 8216 վարակման դեպք: Այինչ կարելի էր խուսափել այս ցուցանիշներից: Ավելին, դրանք կարող էին այլ պատկեր ունենալ, եթե իշխանությունը սեփական շահը չգերադասեր ազգաբնակչության առողղջությունից: Եթե ժամանակին համապատասխան քայլեր ձեռնարկվեին, ընտրվեր ճիշտ մարտավարություն, այսօր վարակվածների ու առավել ևս մահերի գրեթե 80%-ը չէր արձանագրվի:
Սակայն պատկերն այլ է: Վիրուսը տարածվում էր երկրում, իսկ երկրի ղեկավարը Սահմանադրական փոփոխությունների հանրաքվեի քարոզարշավ էր իրականացնում, շրջում մարզերում, հավաքներ կազմակերպում՝ արդյունքում վտանգելով հարյուրավոր մարդկանց առողջությունը: Վարչապետ Փաշինյանն ինքը խթանեց վիրուսի տարածմանը՝ չկարողանալով դիմակայել ՍԴ ներկա կազմից ամեն գնով ազատվելու սեփական մոլուցքին և հանրաքվեի քարոզարշավն անցկացնելով: Պետականամետ մտածողության բացակայության արդյունքում այսօր ունենք կաթվածահար եղած առողջապահական համակարգ, բազում սոցիալական խնդիրների առաջ հայտնված բնակչություն, սեփական բիզնեսի հոգեվարքը տեսնող տնտեսավարողներ և այլն:
Խմբագրական