ՀՀ իշխանությունների գործողությունները հակասում են Փաշինյանի «մինչհեղափոխական» խոստումներին․ ՀԿ
Մենք հիշում ենք, թե ինչպես էր Նիկոլ Փաշինյանը խոսում այն մասին, թե «վարորդները տուգանքների նյութ չեն», սակայն այսօր իշխանություններն ամեն ինչ անում են, որպեսզի տուգանեն մարդկանց, թեեւ իրենք էլ հիանալի գիտեն, որ բնակչությունը հիմնականում անվճարունակ է։ Այս մասին News.am-ի թղթակցի հետ զրույցում հայտարարեց «Ավտովարորդների պաշտպանության լիգա» ՀԿ փոխնախագահ Պողոս Օղլուկյանը։
«Ինչո՞ւ տաքսիների վարորդների ծխելու համար տուգանքները ինչ-որ պահի դարձան ավելի բարձր, քան մյուս վարորդներինը։ Այդ որոշումը կապված է ոչ թե այն բանի հետ, որ տաքսիստի ծխելն ավելի շատ ռիսկեր է պարունակում, քան մյուս վարորդներինը, այլ այն բանի հետ, որպեսզի ստեղծվեն տուգանքներ դուրս գրելու ավելի շատ առիթներ, ինչպես դա տեղի էր ունենում չկապված անվտանգության գոտիների համար տուգանքներ սահմանելու դեպքում։ Բավական չէ, որ տուգանքները 5000-ից բարձրացել են մինչեւ 10000 դրամ, մի բան էլ բալեր են հանվում, այսինքն վարորդը միեւնույն խախտման համար կրկնակի պատասխանատվության է ենթարկվում։ Վրդովմունք է առաջացնում նաեւ թաքնված պարեկության մասին որոշումը, եւ դա հաշվի առնելով այն, որ ամբողջ քաղաքում տեսախցիկներ, սպիդոմետրեր են տեղադրված եւ պարեկություն է անում Ճանապարհային ոստիկանությունը»,- նշեց նա։
Քաղաքում, նրա խոսքերով, զգացվում է ճանապարհային նշանների սուր անբավարարություն, եւ կարելի էր միջոցներն ուղղել այդ եւ շատ այլ խնդիրների լուծմանը, իսկ թաքնված պարեկությունը լրացուցիչ լարվածություն կստեղծի վարորդների համար։
Փորձագետը նկատեց, որ մինչ հեղափոխությունը Փաշինյանը հայտարարել էր, թե տաքսիստների աշխատավարձը կբարձրանա 12000 դրամով, քանի որ նրանք ազատվում են հարկերի վճարումից, որից հետո տաքսու վարորդներին սկսեցին արտոնագրեր տալ, սակայն այսօր, երբ նրանք դիմում են աջակցություն ստանալու համար, նրանց մերժում են՝ հիմնվելով այն բանի վրա, որ չգրանցված աշխատակիցներ են։
«Պարադոքսն այն է, որ երբ նրանք, ովքեր արտոնագիր չեն ստեցել, իսկ դրանք 300-400 մարդ են, դիմել են աջակցություն ստանալու համար, կառավարությունից ասել են, թե նրանց արտոնագրերը ավտոմատ կերպով զրոյացվել են։ Բացի այդ, նրանց հաշիվներին պարտքեր են մնացել՝ սկսած այն ժամանակից, երբ հայտարարվեց 12000 դրամի չափով հարկերի վճարումից ազատելու մասին»,- եզրափակեց Պողոս Օղլուկյանը։