Սեւան քաղաքի 20-ամյա բնակիչը հետախուզվում է՝ Գեղամավան գյուղի 22-ամյա երիտասարդին դանակահարելու մեղադրանքով
2020 թվականի մայիսի 13-ին, ժամը` 21:10-ին, «Սեւանի բժշկական կենտրոն» ՓԲԸ-ից հաղորդում է ստացվել այն մասին, որ իրենց մոտ կրծքավանդակի հետին մակերեսի բազմաթիվ ծակած-կտրած թափանցող վերքերով բուժօգնության է դիմել Գեղարքունիքի մարզի Գեղամավան գյուղի 22-ամյա բնակիչ:
ՀՀ քննչական կոմիտեի տեղեկատվության եւ հասարակայնության հետ կապերի բաժնից հայտնում են, որ նախնական տվյալներով՝ 2020 թվականի մայիսի 13-ին՝ ժամը` 19:00-ի սահմաններում, Սեւան քաղաքի 20-ամյա բնակիչը վիճաբանել է Գեղամավան գյուղի բնակիչների՝ հայր եւ որդիների հետ՝ ճանապարհը վերջիններիս պատկանող մանր եղջերավոր անասունների պատճառով անանցանելի լինելու հարցի շուրջ: Այնուհետեւ 20-ամյա երիտասարդը, քննությամբ դեռեւս ինքնությունը չպարզված շուրջ 10 անձանց հետ միասին, վիճաբանությունը շարունակել է Գեղամավան գյուղի մշակույթի պալատի շենքի հարակից հատվածում, որը վերածվել է ծեծկռտուքի, որի ընթացքում էլ իր մոտ գտնվող դանակով հարվածներ է հասցրել 22-ամյա երիտասարդի թիկունքին՝ առերեւույթ դիտավորությամբ պատճառելով ծանր մարմնական վնաս՝ կրծքավանդակի հետին մակերեսի ծակած-կտրած թափանցող վերքերի ձեւով, եւ դիմել փախուստի:
Նախաքննության ընթացքում կատարվել են մի շարք քննչական գործողություններ, այդ թվում՝ դեպքի վայրի զննություն, որի ժամանակ հայտնաբերվել են արնանման հետքեր, վերցվել են փորձանմուշներ, կատարվել են խուզարկություններ եւ առգրավումներ, նշանակվել է դատաբժշկական փորձաքննություն, հարցաքննվել են մի շարք անձինք։
Ձեռք բերված բավարար ապացույցների համակցությամբ՝ որոշում է կայացվել 20-ամյա երիտասարդին ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը) 1-ին մասով որպես մեղադրյալ ներգրավելու մասին, վերջինիս նկատմամբ որպես խափանման միջոց է ընտրվել կալանավորումը եւ հայտարարվել հետախուզում:
Նախաքննությունը շարունակվում է:
Ձեռնարկվում են միջոցառումներ՝ դեպքի բոլոր հանգամանքները պարզելու, օբյեկտիվ եւ լրիվ քննություն ապահովելու, հետախուզվողին հայտնաբերելու, միջադեպին մասնակից անձանց շրջանակը պարզելու, ցուցմունքներում մատնանշված հանգամանքներն ստուգելու ուղղությամբ: